Ég vissi heldur ekki af þessum dómi í Philips-Nokia málinu, og mun lesa og dreifa meðal þeirra sem eru að spá í þetta. Þetta er mjög jákvætt… heldurðu samt að það sé ekki mögulegt að, til að uppfylla ákvæði samningsins (þótt þetta sé minnir mig valkvæmt) verði sköpuð lagaheimild?

Allaveganna lítur út í dag eins og þessum samningi verði hafnað. Vonandi verður af því. Hann gerir svo fáum gott, og svo mörgum illt.

Þú segir að ACTA muni hafa áhrif á Íslandi með tíð og tíma, m.a. vegna Enforcement Directive, tilskipun Evrópusambandsins Nr 48/2004 um framfylgni hugverkaréttar. Það var hins vegar álit nefndar sem samdi lagafrumvarpið um öflun sönnunargagna vegna ætlaðra brota á hugverkaréttindum (lög nr 53/2006) á sínum tíma að tilskipun þessa beri EKKI að innleiða á Íslandi þar sem hún taki til úrræða til fullnustu hugverkaréttinda og falli því ekki undir svið EES samningsins (sjá kafla II í athugasemdum við lagafrumvarpið, sem er að finna hér http://www.althingi.is/altext/132/s/0360.html). Orðrétt segir í athugasemdunum „Þegar til þess var litið að ákvæði tilskipunarinnar hafa mestmegnis að geyma réttarfarsreglur um málsaðild, sönnunargögn og ýmsar bráðabirgðaaðgerðir til að koma í veg fyrir brot gegn hugverkaréttindum var um það einhugur á fundi viðkomandi undirnefndar fastanefndar EFTA-ríkjanna 21. júní 2005 að ákvæði tilskipunarinnar væru ekki þess eðlis að hún yrði tekin upp í EES-samninginn.“ Svo framarlega sem ég veit leikur því mikill vafi á hvort áhrif ACTA verði einhver á Íslandi ef svo fer að Evrópuþingið staðfesti samninginn í júní.

Þú segir einnig dæmi þínu hér að ofan að „Samheitalyf sem eru framleidd á Indlandi, á leið til Brasilíu, sem hvorugt er aðildarland að ACTA, gætu verið umskipuð í Rotterdam, sem er í aðildarlandi að ACTA, og gerð upptæk þar, ef að efnið er varið með einkaleyfi í Japan.“ Þetta er hins vegar ekki rétt, þar sem nýfallinn úrskurður ECJ í sk. Philips-Nokia máli (C-466/09 og 495/09) sem er að finna hér http://curia.europa.eu/juris/document/document.jsf?text=&docid=115783&pageIndex=0&doclang=EN&mode=doc&dir=&occ=first&part=1&cid=142490 segir einmitt að tollayfirvöld hafi EKKI leyfi til að stöðva sendingar í umflutningi nema þær séu á leið á markað innan Evrópusambandsins, þrátt fyrir að grunur vakni um brot á hugverkaréttindum.

Að öðru leyti þekki ég ekki mikið til allra netmálanna – er einungis vel að mér í hugverkarétti áþreifanlegra vara. En það verður áhugavert að fylgjast með þessum samningi og hvort Ísland mun eiga einhverja aðkomu að honum.